Приближат ся екстремальна Лемковина Ультра Трейль

Малыма крочками приближают ся екстремальны змаганя в літаню, котры уж штораз шырше знаны сут во світі як Лемковина Ультра Трейль. Тогорічна едиция зачне ся – як все осіню – 13. жолтня/октобра 2018 рока на креницкым дептаку, а участникы зас полетят по лісных болотистых путях Лемковины.

Орґанізаторы заплянували на текучы змаганя 5 трас – 30км, 48км, 70км, 100км і ультратяжку трасу долгости 150км. Дві найдолшы трасы зачынают ся в Креници на тамтышнім дептаку в ночы з 12. на 13. жолтня/октобра, а дальшы в Гыровій, Івоничу Здрій і Вышніх Пулавах. Вшыткы кінчат ся на східній краях Лемковины в Команчы. При змаганях Лемковина Ультра Трейль буде тіж паралельно проходил Чемпіонат Польщы в гірскых бігах, котрий спільно з орґанізаторами на трасі 70км рыхтує Польскій Союз Легкой Атлетикы.

Того рока для охочых стартувати осіню в змаганях буде зорґанізувана прогулька, вчас котрой буде мож перейти ся по трасі і посмотріти, як она выглядат без спортовых емоций, дашто уж в голові заплянувати, а самы орґанізаторы реклямуют, же підповідят найліпшы розвязаня, жебы досягнути як найліпшых результатів. Окрем того, буде то добра нагода звидіти прекрасны місця положены попри путях, о котрых ся не думат вчас змагань. Тота акция пройде на 4 тыжні до офіцияльного старту змагань.

Додаме іщы єдно – для тых, што не будут того рока стартувати, але хотіли бы даяк помочы і призріти ся змаганям з боку – орґанізаторы глядают вольонтерів. Старчыт войти на фейсбуковий профіль Лемковина Ультра Трейль, де находят ся потрібны інформациі.

Радийо ЛЕМ.фм являт ся медияльным партнером той подіі.

Джерело: www.ultralemkowyna.pl. Знимка: пресовы материялы / П. Олешак