Днес в Креници пленеровий спектакль o Епіфані Дровняку – «NIKI4LIVE»

Днес Новы Мінеральны Купальні в Креници будут сценом пленерового театрального спектаклю NIKI4LIVE, зрыхтуваного з нагоды 50. річниці смерти Епіфана Дровняка і одкрытя змодернізуваной части обєкту. То наступна з подій, котры проходят в Креници і навязуют до лемківского представника наівного кумшту з Крениці.

Видовиско, в якым заграют жытелі Крениці та акторы Антоні Салай і Анджей Сковрон, режысерує Шымон Будзик з краківского Одверненого Театру. На будинку Новых Мінеральных Купален вказаны будут образы та особы з малюнків Никыфора. Жытелі Крениці выступлят як хор і співати будут лемківскы пісні. Як підкрислят Збіґнєв Волянін, кустош Музею Никыфора в Креници, тото пленерове театральне видовиско єст потверджыньом, же творчіст Дровняка являт ся понадчасовом і інспірує дальшы поколіня артистів. Никыфор выходит поза муры Романівкы і вказаний буде в сучасний і новаторскій спосіб.

Початок подіі о год. 20.30. Вступне дармо.

В курортным місті Крениця в текучым році одбыло ся уж вельо подій, котры навязуют до Епіфана Дровняка – Никыфора в його 50.річницю смерти. На нашым портали писали сме о модерным мурали на трафостациі, стрічы з авторамі і емісиі фабулярного фільму «Мій Никыфор», ци выставі його образів, або выставі артистів, котры Никыфором ся інспірували.

Долов – афіш і відеозапрошыня орґанізаторів на спектакль.