Тямленыма з періодом гітлерівской окупациі словами «Слава Украіні! Героям слава!» офіцияльно будут ся витати украіньскы воякы

Пресова служба украіньского президента Петра Порошенка, придаючы ґу тому відеозапис, подає, же онедолга слова «Слава Украіні! Героям слава!» останут офіцияльным поздоровліньом украіньской арміі. Заклик, перший раз з таком ранґом, мат быти схоснуваний на параді з нагоды Дня Незалежности Украіны 24. серпня/авґуста 2018 р.

Перша част поздоровліня – «Слава Украіні!» – явила ся вчас Украіньской Народной Республикы по І Світовій Войні. Придаючы другій член, одречыня «Героям слава!», выполняючы знану до днес версию, оба закликы были схвалены на ІІ Великым Зборі Орґанізациі Украіньскых Нацийоналистів (ОУН) в Римі в 1939 р. і враз з піднесеном руком (на взір фашыстів і нацистів з Італиі, Німец і профашыстовскых партий і орґанізаций з другых держав) остали офіцияльным поздоровліньом ОУН, а пак Украінськой Повстанчой Арміі (УПА), котры шырили кырвавий террор вчас ІІ Світовой Войны од Волыни по Лемковину і Пряшівску Русь, забиваючы цивільне населіня. Дослідникы того періоду не сут східны што до чысла жертв, але на самій Волыни і в полудньово-східніх воєвідствах окупуваной нацистами Польщы іх кількіст могла іти в соткы тисячів.

Террор досягнул і русиньскы териториі. Украіньскы нацийоналисты коляборували з Гітлером – част з них творила Комітеты Допомогы, інчы были членами окупацийной помічной поліциі (нім. Ukrainische Hilfspolizei), част охочо орґанізувала ся в німецкых одділах Вермахту, окрем того, дакус попри тым, фурт діяла ОУН-УПА. Хоц причын было о вельо більше, на Лемковині іх діяльніст была запамятана барз неґативно м.ін. з того, же украіньскы нацийоналистичны одділы, котры гнобили і ідеолоґізували на свою сторону локальне населіня, заказували тіж Лемкам здравкати ся традицийным «Слава Ісусу Христу», наказуючы заміст того форму «Слава Украіні!».

Неславно одділы УПА і іх «райды» записали ся в істориі і на Пряшівскій Руси. Села Збой, Новоселиця, а предовшыткым Колбасів (масакра в Колбасові) сут дальшыма примірами на тото, же сучасній Украіні, выбераючій героів і іх закликы з фашыстовского періоду, іщы долго не буде близко до світа цивілізуваной Европы.

Знимка: www.president.gov.ua