Кілько годин?

Припомне Вам о тым смартфон, таблет, або компутер, кєд засідите ся днес в ночы зачытаны в статі на нашым портали, але традицийны зиґаркы і будильникы самы з себе не будут знати, жебы о 3.00 год. вночы з 25./26. жолтня переставити час о годину до заду. Можете тото зробити і перед спаньом.

Кєд о тым забудете і, входячы до церкви, будете ся чудувати, же такых співів сте давно не чули, то значыт – браво – встигли сте вкінци на утреню (кєд в Вашій парафіі ся єй служыт). За народным повіджыньом “неділя – то мала Пасха”, а то в Великден акуратні чытане єст Оголосительне слово св. Йоана Златоустого, в котрым чуєме і наштоден хоснуєме такой лем єден його кавальчык: “Хто аж при сонця вершыні годен был прийти, най ся не страхат запізніньом…”. Непреставліня часу даст Вам змогу причыслити ся ґу тым, “Хто о свитаню прибыл…” і за св. Йоаном Златоустым “…най з вдячністю святкує”.*

Єдну годину годен чловек стерпіти. Гірше мают тоты, што цілий тыжден нетерпеливо чекают лем на недільний шопінґ. Міцно рекомендую, возте сой теплы рукавичкы і каву до термічного горняте, бо будете мати свобідну надгодину на повторіня долгой листы необхідных річы, якы мож купити лем в неділю о 10.00 год в гіпермаркеті оддаленым 50км од хыжы. Лем в такым.

Зміна часу з тзв. літнього на зимовий проходит не лем на Лемковині. Предовшыткым Русины з Підкарпатя мусят сесу інформацию взяти до серця, бо кєд забудут переставити будильникы, обудят ся, заваруй Боже, в кыівскій часовій зоні**, а то бы была найсмутнійша подія од моменту “демократычного” рішыня “демократычных” украіньскых власти о знесіню законів тыкаючых ся языковой політыкы (в лютым 2014 р.).

Кєд сме при політыці, Підкарпатскы Русины, оставте глубокій сон. Мож спати годину долше, але жебы не проспати заранішніх выборів. Може даякым выходом буде ношыня двох зиґарків? На лівій руці (бо ближе серця) з Вашым часом, а на правій з кыівскым, жебы встигнути схоснувати Ваше право і недозволити Правым, оСвободителям і інчым паскудам рішати о Вас.

І вы, Руснаци знад Савы і Дунаю, не проспийте. Сім выборчых лист, голосуваня од 7.00 год, сім синьо-золотых поясів попри червеным карпатскым медведю. Лем припомну дальтоністам, синій – не блакітний, а золотий – не жолтий.

Пряшівска Русь може і являт ся єдином, де можут спати спокійно. Там мают уж валютову еврозону, зато не боят ся, же ім піняз скочыт. Евро ани ім не стуніє, ани не вросне. Лем же тота част Карпатской Руси, яка выдала великых – А. Духновича і А. Павловича – най тіж добрі реґулює годину. Най зачне од будильників, бо і найвыдатнійшы будителі, жебы будити інчых, мусіли знати, коли самому ся обудити. І в неділю, і в будний ден.

Но, і найважнійше з важных – лем кобаса найліпша, коли долго буджена.

* тлумачыня з церк.-слав. – Петро Трохановскій.

** Хоц в офіцияльным просторі в закарпатскій области хоснуваний єст тзв. кыівскій час, жытелі Підкарпатской Руси доднес традицийні послугуют ся центральноевропейскым часом. То бодай найтяжший арґумент тзв. Кыйова в борбі з тзв. русиньскым сепаратизмом.