В Перунці посвятили пропамятну таблицю – фотореляция (фот. П. Басалыґа)

В Перунці на західній Лемковині з ініциятивы давных жытелів поставлений был памятник з назвисками родів, котры заселяли село до акциі Вісла в 1947. Станул на місцевым цмонтері, на котрым находят ся іщы лемківскы гробы, а 29. липця/юлия 2018 р. одбыло ся його посвячыня.

З той нагоды зъіхали ся перунчане, так вроджены уж по выгнаню, як і тоты, што памятают іщы передвыселенчий період істориі села, в тым і головний орґанізатор і ініциятор поставліня таблиці – Митро Русинко. Памятник посвятили парох недалекой Крениці, о. прот. Петро Пупчык, враз з о. прот. Мирославом Цідилом, парохом Бортного (родом з Перункы). Співали хористы православных парохій в Креници і Ганчовій. На місци был тіж присутний актуальний ґазда і адміністратор римокатолицкой парохіі в Чырній, до котрой приналежыт дочырня Перунка, о. Ришард Кудронь.

Пониже знимкы од спілпрацівника порталю lem.fm і редакциі «Бесіды», Петра Басалыґы, за котры сердечно дякуєме авторови.