«Лемківскє Літо» на знимках

Што рока в Чмелю при Хоцянові православна парохія св. Тройці в Любіні успішно орґанізує культурну подію пн. «Лемківскє Літо». Тогорічна стріча розметаных по чужыні родаків проходила 14. липця/юлия.

На «Лемківскє Літо» приходят не лем Лемкы, але тіж польскы сусідове і представникы самоурядовых власти. Парохія, на челі з о. Богданом Репелом, старат ся так орґанізувати акцию, штобы каждий нашол дашто для себе. Того рока на сцені выступили лемківскы фольклорны і модерны ансамблі (Ластівчата, Розтока, н’лем фольк) та заприязнений польскій колектив з сусіднього Собіна (дав. Шронова). В Чмелю дебютувала і ґрупа школярів музычной школы з Ліґниці, котра од деякого часу вчыт ся выконувати лемківску музыку. Чмелякы выступили з новопокликаным Лемківскым Музычным Ансамбльом. Вельо часу присвячено наймолодшым артистам, котры співали і рецитували лемківскы творы.

Вчас подіі мож было коштувати вшелеякых страв, рыхтуваных орґанізаторами і парохіянами любіньской церкви. Орґанізаторы подумали на наймолодшых, рыхтуючы про них забавы і спортовы змаганя. На зачаток подіі о. Богдан Репела одслужыл молебен при находячым ся близко спортового пляцу кресті.

Окрем парохіi стрічы патронували вєдно село Чмель, Уряд Міста Хоцянів ай Хоцянівскій Осередок Культуры. Подію спілфінансувал Уряд Міста Любін. «Лемківскє Літо» орґанізуване є од 2007 р.