«Слово» – Праздник верховных апостолів Петра і Павла – неділя, 9.00 год.

Празднуєме Память святых апостолів Петра і Павла. Петро походив із Віфтсаїды в Ґалілеї і быв рыбарьом. Не мав даяке, бы сьме повіли, теолоґічне знаня, ці соціалне поставліня.

Ісус приходить ку ньому в часі, кедь ся занимать ловом рыб, но той ночі оперед, вєдно з далшыма, не поїмали нич. Ісус му наказує спустити сіті на глубину. Хоць Петро зунованый по цілоночнім намаганю знав, же то ку ничому не буде, но на слово Ісуса то зробив, а не быв обаламученый, но поїмав велике множество рыб. То сімболізовало його апостольску діялность і ловліня до сіті Божого царьства, на котре го Ісус кликав. Петро охабив вшытко і ішов за ним. Щіро увірив і любив Господа. Быв свідком многых чудесных діл, і такых, котры іншы апостолы не виділи. Ісус му за вызнаня, же Ісус є Хрістос, обіцять на вірі в тото вызнаня збудовати свою Церьков, котрій не одолають ворота аду. Но наперек тому приходить і ку підкопнутю в його жывоті в часі Хрістовых терпінь, што му Ісус ясно передповів. Но Петро щіро покаяв ся, а тота скушеность го іщі веце приближыла ку Богу і повекшала його любов, што і засвідчів мученицьков смертьов на кресті. А як переданя говорить, умер роспятый долу головов, бо ся не чув достойный умерти так, як його Божественый Учітель.

Апостол Павел походив з Тарзу, із родины фарісея, котрый здобыв римске ґражданство, а Павел (тогды ішчі Савл) ся в нім уж народив. Одмаленька выростав, як ученик славного учітеля Ґамаліїла, запалив ся ревностьов за Божый закон і традіції отців. Кедь ся стрітив з хрістіанством, поважовав то за огрожіня віры і традіцій, і прото ся старав проти нього бойовати. Іде і до Дамаску, і там хоче позаперати тых, што ся голосили ку Хрістови. Но там навернутый Хрістом, ставать ся апостол народів. Зохабив нам 14 писем, в котрых є выражена його велика віра і любов ку Хрістови. А наконець і він умертаь як мученик а зато, же мав римске гражданство, быв стятый мечом в Римі.

Приклад св. апостолів най буде про нас потіхов і посилов, же Бог не одвергує никого. Павел, котрый не познав Хріста репрезентує тых, што суть далеко од Бога, ці непокрещеных ці покрещеных, а нежыючіх подля крещіня. Петро зясь тых, што ся старають жыти духовный жывот, но упадуть. Бог не одвергує ани єдных ани другых, але каждого кличе ку спасіню. Слава Ісусу Хрісту!

В неділю, 15. юля 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 15. юля о 15.00 о 20.00 год. і 16. юля о 2.00, год. за русиньскым часом.

Фото: Свв. Петро і Павел і Хрісмо́н (Хрістомоноґрам) Хі-Ро Wikipedia.