«Світ під Кычером» завитал до Крениці

В середу, 11. липця/юлия 2018 р., проходил в Креници концерт фольклорных ансамблів під назвом «Лемкы і іх гості для Крениці», а вшытко тото в рамках 21. Медженародного Фольклорного Фестівалю «Світ під Кычером». То 21. едиция того фестівалю, котрий тырват од 29. червця/юня і закінчыл ся фіналовым концертом тіж в Креници 12. липця/юлия, на головным дептаку о 15.30 год.

Того рока в рамках «Світа під Кычером» выступили ансамблі з Колюмбіі, Арґентины, Непалю, Словациі, Чешской Республикы, Пілнічного Кыпру, Украіны і Польщы. В тым році лем єден лемківскій ансамбль представлял нашу культуру. То традицйно, як што рока, Лемківскій Ансамбль Пісні і Танця «Кычера», кoтрий тіж єст орґанізатором цілого фестівалю. Окрем того приіхали два ансамблі з Украіны, предствляючы фольклор украіньского Поліся.

Цілю Фестівалю є інтеґрувати люди з ріжных стран світа і вказувати ріжны народны культуры в танцях і співанках. Як мож было обзерати, в Креници обзераючых не бракувало і певно о рік Фестіваль «Світ під Кычером» зас загостит на Лемковині.

фот. Якуб Зиґмунт