Фестівал духовных піснь візантійского обряду

Ґрекокатолицьке архієпіскопство в пряшові вєдно зо Здружіньом Сакралны співы Выходу вас позывають на XXIII. річник Міджінародного фестівалу духовных піснь візантійского обряду, котрый ся одбуде під покровительством высокопреосвященого владыкы Йоана (Бабяка), архієпіскопа пряшівского і метрополіты Словакії.

Фестівал буде проходити в днях 7. – 9. новембра 2014 р. в Катедралнім соборі св. Йоана Крестителя в Пряшові. На фестівалі будуть брати участь Ґрекокатолиьцкый катедралный хор св. Йоана Крестителя з Пряшова, Ґрекокатолицькый катедралный хор Хрізостомос із Братіславы, Хор св. Кіріла і Методія при Катедралнім соборі Народжіня Пресвятой Богородиці в Кошыцях, Ґрекокатолицькый катедралный хор Кірілометодіон із Братіславы, Хор св. Романа Солодкопівця з Пряшова, Співацькый хор Ґаудеамус із Бырна (Чеська републіка), Хор св. Даміяна при Ґрекокатолицькій богословскій семінарії в Ніредьгазі (Мадярьско) і Хор Глагол з Пряшова.

Фестівал є орґанізованый дякуючі Міністерству културы Словацькой републікы. Детайлны інформації долов на плаґаті.