«Мій Никыфор» – проєкция і стріча з авторами

В рамках подій присвяченых 50. річници смерти Никыфора, орґанізуваных Округовым Музейом з Нового Санча, в середу, 11. липця/юля 2018 р., о 19.00 год. в концертовій сали Головной Пияльні в Креници выемітуваний буде фабулярний фільм в режысериі Кжыштофа Краузе пн. «Мій Никыфор».

Сценарий фільму оснований на правдивых подіях навязує до остатніх років жытя русиньского непрофесийного маляря Никыфора (Епіфана Дровняка). Головном темом образу єст істория камаратуваня Никыфора з польскым малярьом Марияном Влосіньскым. Фільмовы кадры были зниманы в Креници, Чырній, Санчы і Пивничній.

По проєкциі, яка буде дармова, плянувана єст стріча з авторком сценария фільму – Йоанном Кос-Краузе, і акторами Йовітом Будник, Романом Ґонтарчыком і Єжы Ґудейком.

Головну ролю Никыфора в фільмі заграла польска акторка, яка за ціле артистичне жытя знана была лем з граных по мастерскы епізодів, народжена во Львові, Христина Фельдман.

В 2005 р. на фільмовым фестівали в Карльовых Варах «Мій Никыфор» достал три головны нагороды – за найліпший фільм, для Кжыштофа Краузе за режысерию і дла Христины Фельдман за найліпшу акторску креацию (женьску).

Радийо Руской Бурсы ЛЕМ.фм єст медияльным партнером подій присвяченых 50. річници смерти Никыфора.