Русины звернули ся писмом до київской канцеларії Рады Европы

Із датов 19-ый юн 2018-го рока было загнане писмо Мортенови Енберґови, голові канцеларії Рады Европы в Києві, од русиньскых представителів Підкарпатя і Северной Америкы. Русины жадають выповніня пятьох пунктів.

Писмо опередила особна стріча Енберґа із головов Народной рады Русинів Закарпатя Євгеном Жупаном і честным председом Світовой рады Русинів Павлом Робертом Маґочійом. Тота проходила іщі 4-го юна 2018-го року в Києві. На ній было Мортеном Енберґом запропоновано, жебы Русины написали свої пожадавкы, котры бы ся мали просадити на теріторії Україны.

В писмі, під котре ся окрім Жупана і Маґочія підписав і Николас Купеньскый, председа Світовой академії карпаторусиньской културы, є наформулованых пять пожадавок. Русины жадають вызнаня Києвом свого народа як окремого, котрый не є жадным субетносом іншого народа. В слідуючім переписі населіня на Україні жадають мати окремый код про записованя і розрізніня русиньской народности як окремой. Так само є пожадоване вызнаня русиньского языка як окремого славяньского языка. На теріторії днешньой Закарпатьской области Україны русиньскы представителі жадають запроваджіня навчаня русиньского языка і културы на основных школах. Із школством є повязана і остатня пожадавка. На Факулті історії Ужгородьской націоналной універзіты жадають засновати центер або катедру карпаторусиньскый штудій – карпаторусиністікы.

Вєдно із писмом быв загнаный два і пів сторінковый апендікс, в котрім ся окремы пункты київскій канцеларії Рады Европы детайлніше пояснюють.

Рада Европы є меджінародна (меджівладна) орґанізація европскых держав, котрой головным цільом є охорона людьскых прав і укріпляня плуралітной демокрації, даваня вкладу до усвідомліня і розвитку европской културной індентічности, гармонізація права европскых держав, гляданя рішінь на проблемы як ксенофобія, меншыны, охорона жывотного оточіня ітд. Так само помагать восточноевропскым державам при їх модернізації і при демократізачных реформах. Україна є членом Рады Европы од 1995-го року.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА