ЛемОН на іменинах Нового Санча

Популярна пленерова імпреза Іменины Нового Санча 2018 буде проходила в днях 6.-8. липця/юлия. Вчас подіі на новосандецкым рынку обізриме і почуєме участників Фестівалю Дітячой Співанкы, звізду поп-рока та пленерове видовиско присвячене 100. річници одзысканя Польщом незалежности.

На подію што рока приходят тисячы, жебы послухати концертів ріжных артистів. Уряд Міста Нового Санча запрашат в пятницю, 6. липця/юлия, на Фіналовий Концерт Фестівалю Дітячой Співанкы «Шковраночок 2018», а в неділю, 8. липця/юлия, на пленерове видовиско «В білым і червеным, музыком вызволены» орґанізуване з нагоды 100. річниці одзысканя Польщом незалежности.

Окрем того буде тіж великій лемківскій акцент. Суботньом звіздом подіі буде ЛемОН – популярний ансамбль Ігоря Гербута, знаний м.ін. з такых гітів як «Літай пташко» ци «Девят». Концерт зачне ся о 22:00 год.

Фот. Фб фанпейдж ансамблю ЛемОН