«Лаґєр в Явожні в наррациях лемківской спільноты памяти» реферат проф. Євы Міхны – віторок, 20.00 год.

15 червця/юна одбыла ся наукова конферениця орґанізувана через Музей Міста Явожно пн. Лаґєр двох тоталітаризмів. Явожно 1943-1956. 

Вчас конференциі запрезентуваны были рефераты присвячены істориі явожняньского лаґру. Окрем выступлінь науковців, орґанізаторы придумали стрічу і дискусию з бывшыма політичныма вязнями – Вінцентым Б. Пыком і Лонґіном Росіцкым. До лемківскых тем навязала проф. Єва Міхна з Ягайлоньского Університету в выступліню пн. «Лаґєр в Явожні в наррациях лемківской спільноты памяти».

Назва Лаґєр двох тоталітаризмів є хоснувана в історийоґрафіі на окрисліня трьох ріжных таборів, якы функцийонували в тым самым місци і єден по другым. В роках 1943-1945 был ту підлаґєр KL Auschwitz: Neu-Dachs. В 1945 р. комуністичны власти переняли понімецку інфраструктуру і сотворили Центральний Лаґєр Працы Явожно, в якым, медже інчыма, вязнены і мучены были Лемкы. В 1949 р. ліквідували таборы працы. В тым часі в Явожні зачала ся перебудова ЦЛП на потребы будучого експериментального арешту для молодых вязнів, котрий функцийонувал в роках 1951-1955. В січни/януарі 1956 р. переформувано го в Центральну Вязницю Явожно, яку остаточні ліквідувано в серпни/авґусті того-ж рока. Товды был конец тринадцетрічной істориі явожняньского лаґру. Тот табір то місце символичной стрічы нацизму і комунізму.

Радийо Руской Бурсы ЛЕМ.фм было медияльным патроном конференциі Лаґєр двох тоталітаризмів. Явожно 1943-1956.