Меджілабірці в проєкті з польскым Коросном

Меджілабірці подали сполочный проєкт із польскым містом Коросно в рамках проґраму черезгранічной співпраці, з котрого бы місто під Камянов хотіло купити турістічный влак на колесах. Інформовав о тім словацькый денник Korzár.

Меджілабірці і Коросно подали кінцьом апріля проєкт під назвов Модернізація інфраштруктуры про мултімодалный транспорт в Коросні і Меджілабірцях. Головнов актівностьов за Меджілабірці є купліня турістічного влаку. Локомотіва і два ваґоны про 40 особ бы мали стояти коло Музею модерного уменя Енді Варгола. Турістів бы місто хотіли возити по місті і близкій околіці. В плані суть місця як Краснобрідьскый монастырь, скулптура Князя Лабірця в Габурі ці перше освободжене село в бывшій Чехословакії – Калинів.

Далше має місто в плані з проєкту наіншталовати електронічны табулі з ґрафіконом влаків і автобусів на малій і великій желізнічній штації ці выбудованя трьох новых заставок автобусу. Сума на реалізацію проєкту є 364 308 евр, з чого 95 процент є фінанчный вклад з ґранту, котрый не треба вертати і місто дає до розрахунку проєкту решту, значіть 5 процент.

Проєкты бы ся мали схвальовати в новембрі, реалізація є напланована на слідуючій рік. Пріматор міста Владісла Вышновскый рахує зо схваліньом черезгранічного проєкту і обіцять собі од нього затрактівніня міста почас літньой турістічной сезоны.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА