Ґорлицкій повіт дотує памятникы

На послідній XXXVIII сесиі Рады Ґорлицкого Повіту была схвалена постанова про признаня дотаций на консерваторскы, реставраторскы і будовляны роботы при памятниках вписаных до державного реґістру. Разом признано 60.000 зл.

Грошы переданы будут м.ін. для грекокатолицкой парохіі Рождества Пресвятой Богородиці в Розділю. На зміцніня церковной конструкциі Рада Ґорлицкого Повіту переказала 30 тис. зл. Про розділяньску парохію то барз цінна дотация, зато што місцевий храм од років потрібувал помочы – было загорожыня, же завалят ся камінны стіны.

5.000 зл трафит до Єпархіяльного Осередка Православной Культуры «Елпіс» в Ґорлицях, якій дотацию схоснує на дальшу консервацию церковных стародруків – Апостола і Псалтыря.

Рада Повіту конечно фінансово підпорит іщы три інчы римокатолицкы парохіі. 3.700 зл піде до костела св. Миколая в Сідлисках на консервацию деревяной хрестительниці. 12.300 зл переданых буде для парохіі св. Андрия Апостола в Рожновицях, де зроблений має быти противламаньовий систем і шалюнок стін. Дотувана буде тіж парохія Божой Матери в Шымбару, в тамтышнім храмі за квоту 9.000 зл зроблены будут консерваторскы працы при розписі стіны за бічным олтарьом Серця Ісуса Христа.