«Слово» – Неділя росслабленного – неділя, 9.00 год.

Пережываме радостный час воскресіня Хріста. Опередні неділі: Томова, котра нам вказує на апостола Тому, якого Ісус кличе од невірства ку вірі, або Неділя міроносительок, котра вказує на жены міроносителькы ідучі ку гробу, глядаючі мертвого тіла з плачом і вертають ся уж як благозвістователькы. Они суть посланы наперед анеглом при гробі, а потім і самым Господом, жебы звістовали тоту радостну новину.

Но повіме собі, яке одношіня мать днешня Неділя росслабленого ку празднику Воскресіня. Тадь ту ся не говорить о воскресіню, але о выздравліню чоловіка, котрый 38 років быв тажко хворым. Ісус приходить до Єрусалима на місце, котре ся зове вівчов купальньов, де было много хворых. Там одбывала ся подія, котра была на причіні, же там было много хворых. Ангел Божый сходив на часы і сколотив воду, і хто із них першый вошов такой по сколотіню, быв здравый. Ісус там находить чоловіка, котрый там уж довгы рокы лежав. Звідує ся: Хочеш вызравіти? Хворый одповів: Хочу, но не мам чоловіка, котрый бы ня зніс до воды, а кідь я ся там якось дотягну, іншый мене спередить. Ісус му говорить: Встань, берь свою постіль а ідь. А тот чоловік послухав, зрозумів, же в тых словах діє Божа сила. А не быв росчарованый. Але такой быв здравый. А Ісус по часі його находить знова, но находить його в церькви, тот чоловік пришов подяковати Богу за своє выздравліня. Ісус му говорить: Ты уж здравый, но веце не гріш, жебы ся з тобов не стало дашто гірше.

Повіме собі, што іщі гірше могло бы стати ся тому чоловіку, котрый тілько того вытерпів? Ісус вказує на дашто важніше. Тілесна хворота, ай кідь є довгочасна, раз предці перестане, нашов смертьов. Но хворота душі, кідь чоловік одыйде невыздравленый із того світа, буде дале продовжати, і по воскресіню мертвых ся придасть і терпіня тіла, а то на цілу вічность. Так тоты слова не суть страшіньом ани грозьбов, але люблячім напомянутьом, а то не лем тому чоловіку, але нам вшыткым. Ісус свойов смертьов зничів смерть, але мы маме свободну волю, а можеме выберати меджі добром і злом.

Ісус напоминать: Жыйте воскресіньом, жыйте новым жывотом в зъєдиніню зо мнов, не вертайте ся назад до рабста гріха і смерти вічной, жебы сьте єй не мусили раз зазнати в реалности. Прото най тоты Хрістовы слова резонують і в нашім жывоті: маме здравля (душі) – Боже одпущіня гріхів, не вертайме ся добровольно, рішіньом свойой волі, не слухайме нашептованя злого, жебы ся нам не стало дашто гірше. Хрістос воскрес!

В неділю, 29. апріля 2018 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 29. апріля о 15.00, 20.00 год. і 30. апріля о 2.00, год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Фото: Пітер Артсен, Вылічіня росслабленого у Віфтезді. Жрідло: Wikipedia