Цінне одкрытя іконы Спаса Вседержытеля з церкви в Чарній

Консерваторы з Выділу Консервациі і Реставрациі Діл Мистецтв Академіі Красных Мистецтв в Кракові довершыли цінного одкрытя про сакральну спадковину Лемковины. Вчас веденых робіт одкрыта была ікона Спаса Вседержытеля з І пол. XVII ст., яка походит з грекокатолицкой церкви св. Димитрия в Чарній.

Ікона Спаса Вседержытеля находила ся на дереві під намалюваном на ній іконі Тайной Вечері. Як інформуют працівникы Академіі Красных Мистецтв в Кракові, молодшу, верхню ікону датує ся на ХІХ ст.  Є она на дуже низшым артистичным рівни, але мат і історичну вартіст. Тым більше тішыт, што консерваторам при одділяню єдной іконы од другой повело ся заховати обі.

Перемалюваня одділено од ориґінальной іконы при схоснуваню методы хімічного розділяня. Цілу процедуру провела Надія Вывюрска в рамках маґістерской роботы під кєрунком др Малґожаты Новаліньской в єдиній на світі Працовни Переношыня і Розділяня Стояковых Малюнків. Тепер тырвают роботы повязаны з детальным описаньом та опрацуваньом ікон.

Метода, при помочы котрой повело ся одділити дві речены іконы, є методом з высокым ступеньом ризика. Што інтересуюче, в Польщы того рода роботы підниманы сут од 70. років ХХ ст., але до той поры проведено іх лем бл. 20. За каждым разом рішыня про тото ци консерваторы рушат верхню ікону цілю одділити єй од старшой, прикрытой, попереджают фізико-хімічна аналіза, досліджыня технікы выконаня та дальшы оціны, котры зменшают ризико знищыня творів. Великє значыня мают тіж особисты скушености консерватора, понеже, так як і в тым примірі, мусит він докладні підтинати образ о грубости не більшій як сотны частины міліметра. При такых роботах основом є тримати ся професийной етикы, котра на першым місци наказує мати добро даного діла.

Як інформувала нашу редакцию др Малґожата Новаліньска з Працовні Переношыня і Розділяня Стояковых Малюнків, до XVIII ст. ікона Спаса Вседержытеля як намістна ікона находила ся в чарняньскым іконостасі. По  перемалюваню, уж як ікона Тайной Вечері, вісіла на єдній зо стін церкви, а в остатніх роках, з огляду на безпеку, тримана была на плебаніі в недалекых Брунарах. Дальшы іконы з ориґінального іконостасу тіж ся заховали і находят ся тепер в Округовым Музею в Новым Санчы. По консервациі обі іконы мают вернути на Лемковину, до церкви в Чарній.

фот. Павел Ґонсьор, Академія Красных Мистецтв в Кракові