Поетицкій «Сон про Карпаты»

Публична Бібліотека Міста і Ґміны Пивнична-Здрій оголосила XV едицию Медженародного Поетицкого Конкурсу «Сон про Карпаты», якій направлений є на молодых і старшых творців, котрым близкє є писаня про горы, жыючого в них чловека та природу.

Конкурс, якій знаний є як «Вересовиско», пройде в двох віковых катеґориях. Перша з них є про молодіж в віку од 14-18 років, друга направлена єст на дорослых. Конкурсовы вершы треба надсылати до 25. червця/юнія 2018 р. на адрес орґанізатора. Мож выступити максимально з трьома вершами, якы не были ниґде перше публикуваны ани нагороджаны в інчых конкурсах.

Творы повинны містити предовшыткым мотивы гірской природы, чловека, краєвиду і шыроко пониманой традициі і культуры Карпат. До конкурсу прошены сут поеты погранича, головно Полякы, Словакы, Лемкы, але тіж вшыткы інчы, котры оддают ся писаню про горы і достерігают головну ціль конкурсу.

Надосланы вершы будут оцінены конкурсовым жырі, ведучым якого є краківскій поета Юзеф Баран. Проголошыня результатів одбуде ся 18. серпня/авґуста 2018 р. в видовисковій сали Культурного Дому в Пивничній. Мож выграти так фінансовы, як і інчы специяльны нагороды.

В попередніх едициях конкурсу участ брали єдны з найліпшых сучасных лемківскых поетів. Зо своіма вершами выступували Петро Мурянка, Олена Дуць-Файфер, Володислав Грабан, Штефанія Трохановска, Юлия Дошна. Лемкы все были третьом частю участників – попри Поляках і Словаках.

Спілорґанізаторами акциі сут Містецко-Ґмінний Осередок Культуры в Пивничній ай місцевы творці. Детальний реґулямін конкурсу найдете за тым мотузком.

фот. лавреаты конкурсу з 2016 р.