Душы країны і людей – фотоґрафічна публікація о Підкарпатьскій Руси

В тых днях Общество приятелів Підкарпатьской Руси (Spolek přátel Podkarpatské Rusi) із Чеськой републікы приходить перед чітателів зо свойов новов фотоґрафічнов публікаційов писанов по чеськы.

Новотов меджі публікаціями орґанізації є книжка під назвов Душы країны і людей. Фотоґрафії з Підкарпатьской Руси (Duše krajiny i lidí. Fotografie z Podkarpatské Rusi), котрой автором є родак із Підкарпатя Рудолф Штурса. Книжка обсягує чорнобілы фотоґрафії із 60-ых років і фаребны фотоґрафії із 90-ых років ХХ. столітя. Штурса, автор жыючій в Бырні, ся до свого родиска часто вертав як професіоналный фотоґраф. Частьов книжкы є і россяглый розговор з фотоґрафом, котрый зробив Томаш Пілат, не бракує спредслово ку єдній із Штурсовых выставок, од його приятеля Яроміра Томечкы.

Рудолф Штурса ся народив 24-го юла 1927-го року селі Воловоє на Підкарпатьскій Руси. Штурсову фотоґрафічну творчость овпливнили такы фотоґрафы як Ян Лаушман, Їжі Єнічек, но головно фотоґраф браный за основателя модерной фотожурналістікы Генрі Картіер-Брессон. Як єден із першых чеськых фотоґрафів зачав фотити на кінфоілм, і то як раз по взорі Картіе-Брессона. Овпливнив го і писатель Яромір Томечек, його прозы описують Підкарпатьску Русь, теріторію, де ся Штурса народив і де ся формовали його естетічны позіції.

Штурса творить якусь память свойой добы. Іншпірують го нелем емоціоналны або візуалны зажыткы, але і явы, котры ся видять быти на першый погляд неінтересны. Його образовы документы харектерізує інтуітівный смысел про вытварну ефектность чорнобілой фотоґрафії.

Нова публікація має 104 сторінок і обїднати собі єй мож на адресі Общества приятелів Підкарпатьской Руси (Společnost přátel podkarpatské Rusi, Dům národnostních menšin,
Vocelova 602/3, 120 00 Praha 2) або на імейловій адресі j.v.havel@seznam.cz. Книжка буде доступна і в класічній дістрібуції в книгарнях.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА