23-ій марец є Світовым дньом Русинів

На остатнім Світовім конґресі Русинів (СКР), котрый проходив од 29-го юна до 2-го юла 2017-го року в хорватьскім Осієку, было вырішено, же 23-ій марец буде шторік святковати ся як Світовый день Русинів.

Дата была выбрата на день, коли закінчів ся 1-ый Світовый конґрес Русинів, котрый проходив 22-го аж 23-го марца 1991-го року в Меджілабірцях і його головным орґанізатором была Русиньска оброда. Участныма были втогды представителі Русинів зо Словакії (втогды іщі Чехословакія), Польщі, Україны, Северной Америкы і Сербії.

Тот першый світовый форум русиньской комуніты мав велике значіня главні в тім, же наштартовав новодобый возродный процес Русинів во вшыткых областях културно-сполоченьского і хрістіаньского жывота в окремых державах. На конґресі в Меджілабірцях його участници здобыли першы інформації о жывоті Русинів в окремых країнах, надвязали першы меджінародны контакты і договорили ся на конкретній сполупраці. За найосновніше той стрічі мож брати тото, же Русины встановили собі смілы конкретны цілі і поступы, як досягнути вызнаня і зрівноправніня Русинів у своїх країнах.

1-ый СКР по першый раз схвалив Світову раду Русинів (СРР) як найвысшый выконный орґан, котрый буде діяти міджі двома засіданями конґресу. Конґрес схвалив і свойого першого председу, котрым став ся Василь Турок Гетеш, і котрый стояв на челі той меджінародной орґанізації повных 10 років.

Окрім Світового дня Русинів окремы членьскы державы мають выбраты і свої локалны дні Русинів, котры одказують на даяку історічну дію, котра є повязана в тій державі з Русинами.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА