Проєкт желізницьового получыня з Попраду до Крениці

Словацкє Міністерство Транспорту проявило заінтересуваня зорґанізувати желізницьове получыня на пути од підтатряньского Попраду до курорту Крениця по лемківскій стороні Карпат. Малопольскє воєвідство вступні пристало на сесу думку.

Получыня было бы обслугуване через словацкы потягы. Што веце, думкодавці проєкту хочут скомунікувати получыня з дальшыма по польскій стороні, прим. в сторону Тарнова ци Кракова. Плянуваний час подорожы з Попраду до Креници то бл. 2,5 год. Потяг ішол бы м.ін. через русиньскы місцевости так на Пряшівщыні, як і Лемковині. Правдоподібно міг бы затримувати ся в Старій Любовни, Плавци, Орлові, Лелюхові, Мушыні та быти може і в інчых селах.

Успіх реалізациі проєкту залежний є тепер од власти Малопольщы. Вступні воєвідство приняло пропозицию словацкого Міністерсвта Транспорту. Малопольща мала бы спілфінансувати польску част получыня, ідучу од границі до креницкой стациі.