«Слово» – Неділя сыропустна – неділя, 9.00 год.

Неділя сыропустна є послідньов недільов перед вступом на пустыню Святой штиридсятніці, Великого посту. Ісус Хрістос нам в днешнім єванглію хоче подати дакілько добрых порад, як добрі выхосновати тот благодатный час.

Наперед говорить о потребі одпущіня: Кідь вы одпустите людям їх маленькы провины, котрых ся проти вас провинили, і вам ваш небесный Отець одпустить вашы гріхы проти Нього. Но тыж говорить: Кідь вы не одпустите, ани вам не буде одпущено. Другов порадов до Великого посту є униканя фалошности, нещірости. Ісус говорить: А кідь ся постите, не будьте засмучены, як фалшывці, жебы люди виділи, же постите. Най наш піст не про людей. Не вказуйме вонкашніма знаками (захмуреностьов, вонкашнiм взглядом), же постиме, жебы так мати обдив у людей. Тогды наш піст буде бех хосну. Маме постити тілесно (стриманостьов од їдла), но маме постити і душевно (стриманостьов од страстей душы: пыхы, марной славы, гніву, унылости – духовной лінивости, грішной роскоші, насолоду, привязаности ку земному), а не смотрити на то, ці нас дахто видить. Бог видить утаєне, перед ним нич не є скрыте. Він нам одплатить. Третьов порадов є усвідомліня, што є в нас на першім місці. Де перебывають нашы думкы. Ісус говорить: Де є ваше сокровіще (ґр. тесаврос), там буде і ваше сердце. Ці нашы думкы суть напрямены ку Богу, ку вічности, ку небесному богатству, вічному жывоту? Або суть напрямены ку земному богатству, рабству реклам, жалудка, людьскій славі?

Тота свята доба нас веде ку тому, жебы тото змінити. Робити правдиве покаяня – метанію. То є – зміну думаня, зміну напряму нашого жывота. І так перед нами є тот час боголічіня, як выхоснуєме тот час. Маме вшыткы средства ку тому, же його добрі пережыти. Прото не прогайнуйме тым спасителным часом, але выхоснуйме на хосен і спасіня нашой бессмертной душі. Слава Ісусу Хрісту!

В неділю, 18. фебруара 2018 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 18. фебруара о 15.00, 20.00 год. і 19. фебруара o 2.00 год. за русиньскым часом.

Фото: Сповідь. Жрідло: Wikipedia.