ТАД рихтує премєру із текстів Чехова

Театер Александра Духновіча в Пряшові на 15-го марца 2018-го року рихтує свою третю премєру в рамках театралной сезоны 2017/2018. Буде ньов пєса під назвов Ізба ч. 6, котра є збудована на творах Антона Павловіча Чехова.

„Ошарпаный павілон на краю шпыталю десь в російскій ґубернії. Тримають в нім тых, котры в реалнім жывоті не фунґують нормално. Котрых справованя не є полдя норм. Суть мімо нашой реаліты. Як кібы были забытима ролями з якыхсь стародавных пєс… Не робить ся ту терапія, нихто їх нияк не лічіть. Павілон скоріше припоминать тюрму як санаторію. Веде го лікарь Андрій Єфіміч, резіґнованый, котрый пахтить по свободі, пересвідченый о тім, же вшыткы людьскы страсти суть без значіня в осношіню ку вічности. Єдного дня пустить ся до бісіды із паціентом Іваном Дмитрійовічом Ґромовом. Андрія Єфіміча очарить запаліня, котре іщі є в Ґромовови, присвоїть собі його приготовленость змінити тоты обставины. Оцінить його тугу: просто жыти. В єднім моменті зачне лікарь навщівльовати паціентів частіше. І в санаторії зачне ся бісідовати. О людьскых тугах, о ненаповненых снах і ідеалах, любвах, намірах, жывотных очекованях… О промарненых жывотах. На світло світа выходять скрыты токы людьскых інштіктів,“ пише са в антоції ку нові пєсі, котра выникла на основі текстів класіка російской літературы Антона Павловіча Чехова. Конкретно іде о тексты із творів Дядя Ваня, Чайка, Вышньовый сад і Три сестры.

Як пишуть авторы новой драматізації, пєса Ізба ч. 6 чутливо і прозірливо дотулять ся вопросів вины і зодповідности, хворомысельности в сполочности, тілесности і метафізікы. Ненаповнительности людьской долі. Пєса дає до взаємного балансу думку і сценічный образ збудованый на богатій фантазії, сценічній поезії, візуалній імаґінації і неочекованости до себе запасованых сітуацій.

Режію має знова на старости єден із вже стабілно із Театром Александра Духновіча співпрацуючіх режісерів Светозар Спрушаньскый. В окремых ролях представлять ся акторы театру Светлана Шковранова, Владиміра Штефанікова, Даніела Либезнюк, Василь Русиняк, Йосиф Пантликаш, Євґеній Либезнюк, Ладіслав Ладомиряк і Мартін Оравець.

Премєра пєсы Ізба ч. 6 одбуде ся 15-го марца о 19.00 год. на Великій сцені Театру Александра Духновіча в Пряшові.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА