«Слово» – Неділя блудного сына – неділя, 9.00 год.

Євангеліє днешньой Неділі блудного сына нам говорить образный приклад о отцьови, што мав двох сынів. Молодшый не чув ся добрі в домі отця. Єдного дня приходить і жадать о частку, што му належытл. Отець розділив маєток.

Ґрецькый текст говорить, же тот сын не жадав матеріалный маєток, але „узія“ (лат. субстанція) – значіть, хотів маты слободу над жывотом, сам без обмеджіня приписів і заказів. Прягнув по тзв. слободі. Отец їм розділив ґр. „віон“ – жывот. Дав їм тоту можливость. Молодшый сын выхосновав то і одышов до далекой країны, де роспустным жывотом вшытко поргайновав. Што то є далека країна. Є то способ жывота без Бога, без його заповідей. Но скоро спознав, же тото го не наповнить. Зачав бідовати, кідь в тій країні настав голод. Він втогды якбы вошов до себе. Якбы ся обаторив із сна. Здогадав ся на радостный час, як быв в домі отця. Же там іщі і рабы мали хліба понад міру. А він ту умерать із голоду. Так собі повів: Встану і верну ся назад. Но як вернути ся, теперь, кідь вшытко прогайновав, як посмотрить йому до оч. Але встав і ішов. Отець каждого дня выходив посмотрити ці не приходить тот його нещастный сын. А кідь го збачів, розбігнув ся проти нього, шмарив ся му на шыю, нарадованый із його навернутя. Но сын говорить: Отче, я згрішыв проти неба і тебе. Уж не єм достойный ся звати твоїм сыном. Но отець наказав своїм слугам: Скоро принесьте перше облечіня – то є то, котре одшмарив, котре означує приналежность до царьской родины. Дайте му перстінь і обув, заріжте выкормлене теля. Буде ся тішыти і радовати.

Св. Йоан Златоустый говорить, же тот образный приклад є єдным із найкрасшых місць Святого писма. Говорить нам о безконечній любви Бога ку чоловіку. Же Бог чоловіка не опущать. Через голос совісти пригварять ся ніжным голосом, позывать вернути ся, кідь ся чоловік оддалив гріхом, роскошами. А як чоловік одповість на тото кликаня, Бог не доганять чоловіку, але радостно подає своє одпущіня. Тот образный приклад нам указує і тото, як чоловік ся хоче освободити од Божых заповідей, хоче жыти в свободі, без обмеджованя. Але наслідок такого жывота є духовне бідованя. А правдиве щастя і правдива слобода є лем втогды, кідь чоловік жыє жывот із Богом подля його заповідей. Так і мы старайме ся перебывати в домі Отця, в Божій присутности, а кідь ся нам стане, же даєме ся обаламутити злым ці тым світом нагваряньом о фалшывій свободі, вертайме ся скоро назад, покы сьме на тім світі. І Отець нас прийме з радостьов, як прияв і блудного сына. Слава Ісусу Хрісту!

В неділю, 4. фебруара 2018 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 4. фебруара о 15.00, 20.00 год. і 5. фебруара o 2.00 год. за русиньскым часом.

Фото: Притча о блуднім сынови. Жрідло: Wikipedia.