Сестры Бочнєвич Project

Лемківскы варияциі – нововыдана платня сестер Бочнєвич, єст доказом того, што на основі інспірациі народном музыком Русинів можут возникнути новы творы, якы годны найти своє почестне місце на найвызначнійшых музычных сценах, а окрем того стрітити ся з позитивныма реакциями шырокого чысла слухачів. Того рода проєкты продолжают в найвекшій мірі ґрупову достоменніст, бо доказуют культуротворчой потенциі русиньской дідовизны.

Лемківскы варияциі были придуманы як дипломова робота Наталиі Бочнєвич, днес можеме тото написати  – професийного хорового дириґента і Рамоны Бочнєвич гушляркы, котра скомпонувала музыку і приспособила до выконаня на камеральну оркєстру, хор і солистів.

Як пишут сестры Бочнєвич в книжочці долученій до платні – більше як рік тому, коли зродила ся думка скомпонувати «Лемківскы Варияциі», не мрияли сме ани, же поведе ся нам награти платню разом з камеральном оркєстром, хором та солистами. Єднако протягом роботы над твором і концертом з помочом пришли члены Стоваришыня «Руска бурса» і поставили нам они просте звіданя: чом не записати того твору і не послати в світ? Отже, дорогій слухачу, кєд тримаш в руках платню, то значыт. же ся нам повело.

На платни єст записаных девят творів і екстра бонус. На початку звучыт Увертура, а дале і інчы выключні інструментальны композиці – Не мелем, не мелем, Кєд я в поли та загране техніком pizzicato На поточку-м прала. Сут хоровы выконаня співанок Сама я ружу садила, Заграйте мі гудаци і пісні, де звучат солисты. В Дунаю, Дунаю чути бас Януша Квєтня і тенор Стана Квєтня, а в Ой верше, мій верше сопраны Яны Гудзовской – Кіт і Катерины Павловской.

Платня Сестры Бочнєвич Project потішыт вельох і з той причыны, што утверджат потребы формуваня професийных компетенций в рамках каждой творчой і науковой дисциплины лемкознавства. Выданя мож си купити на сайті лем.фм за мотузком.