Мілан Піліп оголосив кандідатуру на пріматора Бардейова

В середу 24-го януара 2018-го року в Бардейові гражданьска платформа myBardejov зорґанізовала пресову конференцію, на котрій представила своїх кандідатів на депутатів містьского заступительства в Бардейові про тогорічны комуналны выборы, котры бы на Словакії мали проходити зачатком новембра.

Так само быв представленый кандідат платформы на функцію пріматора міста. Тым є русиньскый актівіста Мілан Піліп, бывшый председа і сучасный член презідії Округлого стола Русинів Словеньска.

Добре сохраньме, плане зміньме

Платформа myBardejov была заснована три рокы тому, по комуналных выборах у 2014-ім році. Їй цільом є вытворіня проґраму про Бардейов за участи шырокой верейности і поставліня властных кандідатів до выборів у 2018-ім році. Днесь є в ній дакілько десяток актівных людей, інформовали членове платофрмы посердництвом свойой пресовой справы.

„Нашы візії сьме сформуовали до 30-ох пунктів. Суть згорнуты до пятьох округів – робота, бываня, релакс, тото ціле перепоєне транспортом, што є четвертый округ, і ряджене добрым самосправованьом, то є округ пятый. Тоты візії суть соліднов основов нашого будучого волебного проґраму,“ пише ся в пресовій справі.

Платформа myBardejov почас 2017-го рока выдала три чісла властного друкованого обчасника, в котрім поступно презентовала свої візії, ку котрым ся жытелі міста Бардейов могли выразити. Так само была палтформа актівна і на соціалных сітях, де актівісты давали жытелям можливость комуніковати і выражати свої погляды на окремы проблемы, ці в діскусіях або анкетах. І на основі поглядів Бардейовчанів, ці їх припомінок, хотять актівісты, котры днесь оголосили свою кандідатуру, зоставити проґрам про місто, котрый бы мав быти одпрезентованый іщі в першій половині 2018-го року. Актівісты ся в нім хотять рядити геслом: Добре сохраньме, плане зміньме.

За пріматора бы хотіли Мілана Піліпа

Актівісты із платформы myBardejov днесь в рамках пресовой конференції представили сім кандідатів на депутатів і свого кандідата на пріматора міста. Як інформовав Мілан Піліп, список кандідатів ся може іщі росшырити о далшы мена.

За myBardejov кандідатуру на депутата в містьскім заступительстві оголосили Любомір Авґустіньскый, Адам Дзамба, Марія Феркова, Роберт Ґеці, Олівер Поляк, Александер Старинькый і Яромір Здзієбко. За свого пріматора бы радо мали Мілана Піліпа, котрого кандідатуру на найвысшу функцію в місті днесь так само оголосили.

Мілан Піліп

Цілым меном Мілан Ян Піліп (1980) закінчів політолоґію і філозофію на Філозофічній факулті Пряшівской універзіты в Пряшові. Є русиньскым актівістом, председом Містной орґанізації Русинськой оброды на Словеньску в Братіславі. Стояв при выникнутю Округлого стола Русинів Словеньска. В нім быв наперед у функції секретаря, од апріля 2016-го року до фебруара 2017-го року быв председом той русиньской платформы. Того часу є членом презідідії ОСРС. Од децембра 2015-го року є єдным із двох представителів русиньской народностной меншыны у Выборы про народностны і етнічны ґрупы. У 2014-ім році быв як незалежный кандідат зволеный до бардейовского містського заступительства. Є робітником Міністерства обороны Словацькой републікы. В році 2014 му вышла книга під назвов Русиньска народна сімболіка.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА