В Ужгороді одкрыли выставку Івана Манайла

В Закарпатьскім областнім художнім музею ім. Йосифа Бокшая в Ужгороді святотчно одкрыли 12-го януара 2018-го року ретроспектівну выставку русиньского маляря Івана Манайла (1942 – 2010) під назвов Субєктівна реалность. Інформовав о тім портал Uzhgorod.in.

Выставку одкрыв директор музею Франциск Ерфан, котрый повів, же многы із участных на події знали Івана Манайла особно, як ініціатора заснованя памятного музейного будинку свого вітця Федора Манайла в Ужгороді. На одкрытю приговорив ся і ректор Закарпатьской академії умень Іван Небесник, котрый росповів, же із Іваном Манайлом знав ся од 1982-го року. Участна была і родина Івана Манайла, котра жыє в Мадярьску, включно сына Андрія, котрый є так само малярьом.

Выставльованых в Ужгороді творів Івана Манайла є коло 70. Суть меджі нима мальбы і ґрафікы, котры захоплюють вшыткы періоды творчости умелця. Многы творы суть выставелны по першый раз. Експозіцію Івана Манайла мож в Ужгороді видіти до 25-го януара.

Іван Манайло

Народив ся Іван Манайло 16-го януара 1942-го року в Ужогороді, в родині знамого русиньского умелця Федора Манайла. Професійну освіту здобывав наперед в Ужгородьскім умелецько-промысловім учілищу, пізніше штудовав на Київскім умелецькім інштітуті.

В роках 1969 аж 1985 выв учітельом і директором (рр. 1972 аж 1985) Ужгородьского умелецько-промыслового учілища, умелцьом Закарпатьского умелецького фонду, быв єдным із орґанізаторів, а єден час і головов Творчого зъєдиненя професіоналных умелців Закарпатя (укр. Творче об’єднання професійних художників Закарпаття), робив манажера Меджінародной асіоціації „Інтерарт“.

По переселіню ся до Мадярьска в році 1998 залучів ся до діялности русиньского самосправованя в Мадярьску, вів актівну выставну діялноість. У 2009-ім році быв нагородженый державнов нагородов „За заслугы у збогачіню світового уменя і вызначный вклад до укріпліня русиньско-мадярьского приятельства“.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА