«Далі контра Варголь» од марця во Вроцлаві

Знана уж в Польщы выстава прац відомых артистів пн. «Далі контра Варголь» од яри 2018 рока буде вказана во Вроцлаві. То заповід вынятково важной артистичной подіі на Нижнім Шлеску, яка має быти так атракцийом про жытелів міста, як і туристів. 

Выстава загостит в Містецкым Музею во Вроцлаві (одділ музею – Музей Театру ім. Генрика Томашевского). Єй одкрытя заплянувано на половину марця т.р. По тым як была вказана в Варшаві, тепер має ходити по інчых містах Польщы. Ґеній двох, бодай найбільше знаных артистів ХХ ст. до того часу притягнул вельох любителів модерного кумшту. Варшавска выстава была не лем густо одвиджана, але предовшыткым высоко цінена в світі культуры. Вроцлавскій музей старал ся о выставу уж од 2016 рока і аж того рока, вкінци, будеме мати нагоду видіти ю в столици Нижнього Шлеска. 

Контроверсийны артисты уж за жытя стали ся леґендом, а іх роботы перешли до істориі, зміняючы при тым світ мистецтва. Оба конечно креували тото, як постерігали іх вшыткы довкола. Провокували, выкликували скандалі, фурт затерали границі медже жытьом а мистецтвом. Были ексцентричны, здивачалы і контроверсийны, прото єдных цікавили, захопляли, а другы мали для них лем зневажливіст. Знали іх вшыткы, чул о них каждий. Інспірували поколіня артистів, мали влияня на мистецтво, музыку і фільм ХХ столітя. Оба любили славу і грошы. Далі отримал званя Avida Dollars (Жадаючий Гроши), якє было анаґрамом його мена. Варголь твердил, же в місце образу за 200 тис. дулярів ліпше повісити на стіні грошы. Більше – в архіві нашого порталю.