Керестурьскы школярі в словацькім „Керестурі“

Як інформує аґентура Рутенпрес, од 8-го до януара 11-го януара 2018-го року штиридцять школярів осмой класы Основной школы Петро Кузмяк із Руського Керестура бере участь на Зимушній школі в Земпліньскій Тепліці, колись Керестур, на Словакії.

„Школярі будуть мати нагоду спознати старый край, навщівити културны і далшы вызначны місця в містах околіці і дружыти ся із верстевниками тамтешньой школы, в котрой інтернаті будуть уквартельованы,“ інформує аґентура.

Зимушня школа про школярів із Руського Керестура орґанізує ся по другый раз на основі минулого рока пидписаного договору о співпраці меджі Совітом містного самосправованя в Руськім Керестурі і Зепмліньсков Тепліцьов (окрес Требішов). Подорож вєдно із основнов школов орґанізує Націоналный совіт Русинів і вєдно з родічами школярів єй фінанцує із фінанчных средств, котры діставать од містного самосправованя в Кулі.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА