Велийна стріча в Рускій Бурсі

Традицийні уж, як шторока, в Рускій Бурсі в Ґорлицях орґанізувана буде Велийна Стріча, на котру вшыткы сут сердечні прошены. Стріча пройде в пятницю, 29 грудня/децембра, а єй офіцияльний початок запланувано на 16 год.

Шторока єст то добра нагода, жебы в передсвяточным часі зыйти ся, та попробувати велийны стравы і заколядувати. Того дня Руска Бурса буде отворена для вшыткых од самого рана. Хто прийде перше буде мал нагоду зазріти до кухны, з котрой од рана будут розходити ся запахы вареной кєселиці, грыбів, фізолі та другых велийных страв. Охочы будут моглы прилучыти ся до спільного варіня ци ліпліня пірогів. Вшыткы стравы будут рыхтуваны на місци зато придадут ся вшыткы помічны рукы.

Того дня буде тіж добра нагода для молодых люды, котры хотіли бы взяти участ в пробі ансамблю Терочка, ачий записати ся до ансамблю. Група рыхтує отворену пробу, на котру барз сердечні просит вшыткых охочых уж од 13 год. Буде мож посмотріти як ансамбль працує та прылучыти ся до спільного співаня, навчыти даякой новой колядкы.

Специяльным гостьом того вечера буде лемківска артистка з Украіны, Леся Ґорлицка, котра заспіват коляды і інчы співанкы зо свого репертуару. По концерті буде мож уж істи зрыхтуваны велийны стравы – кєселицю, слєдзі, горох, грыбы, капусту, фісолю, ґрулі, ріжны перогы – ци то з капустом і грыбамы ци зо сливкамы або ябком.

По деґустациі буде час і пооповідати про велийны звыкы в своіх домах. Може і серед присутных найдут ся і тоты, котры оповідят як Святий Вечер одходили давно на Лемковині. Товды, коли людям не перешкаджали ани мороз ани великы снігы, жебы перед засіданьом до велийного стола ішли мыти ся в потічку. Коли то сіно клало ся не лем під обрус ци під стіл, а розносило по цілий хыжы, а велийны стравы іло лжыцями з єдной мискы. Не забывано і про звірятах, для котрых прирыхтуване было специяльне відерко, до котрого ґазда одкладал по лжыці каждой стравы. По вечеріі зас ходили колядникы з різдвяным вертепом.

І в Бурсі не бракне спільного колядуваня на закінчыня тогорічной Велийной Стрічы. Іщы раз сердечні вшыткых просиме.