В Пряшові одкрыли памятну таблу Добряньскому

18-го децембра 2017-го року, в день 200-ой річніці народжіня Адолфа Добряньского, святочно закінчіли юбілейный рік, котрый быв выголошеный Округлым столом Русинів Словеньска. Почас цілого рока были події орґанізоавны русиньскыма орґанізаціями присвячены як раз тому юбілею.

Дополідне проґрам в театрі

Святочне закінчіня Року Адолфа Добрянського на понедількове дополідне приготовила в просторах Театру Александра Духновіча Матиця словацька. Добряньскый утримовав тісны односины із словацькыма будителями той добы, быв першым посланцьом в Угорьскім сеймі за Вышнє Угорьско, в котрім обгайовав права нелем Русинів, а і Словаків і далшых славяньскых народів імперії. Докінця быв єдным із основаючіх членів Матиці словацькой і зато є честованый і в словацькых кругах.

Матиця словацька в рамках припомянутя собі русиньского політіка, реформатора приготовила вєдно із Театром Александра Духновіча і Русиньсков обродов на Словеньску святочну академію. Участны могли напаред выслухати лекції о Адолфови Добряньскім. Тоты лекції передали отець Мілан Ясик – ґрекокатолицькый парох в Ольці, автор книжкы о Добряньскім, отець Ян Шафін – декан Праволавной богословской факулты Пряшівской універзіты в Пряшові і Андрій Антоняк. По лекціях слідовав културный проґрам, котрый приготовили русиньскы і словацькы фолклорісты.

Одкрытя таблы  

На другу годину пополідне было в просторах Руського дому в Пряшові приготовлене святочне одкрытя памятной таблы Адолфови Добряснькому, орґанізоване Округлым столом Русинів Словеньска як офіціалне закінчіня юбілейного року.

За Округлый стіл Русинів Словеньска святочну подію вів Петро Медвідь, член презідії. По заспіваню Світовым конґресом Русинів схваленой русиньской гімны Вручаніє (Я Русин был…) слідовав приговор, в котрім ся привітали цінны гості, міджі котрыма были окрім іншых директорка Словацького народного музею – Музею русиньской културы в Пряшові Олґа Ґлосікова, председа Русиньской оброды на Словеньску Мартін Караш, директор радія русин ФМ Петро Штефаняк ці передса Матиці словацькой Маріян Ґешпер, і оцінив ся цілый юбілейный рік, подяковало ся вшыткым, котры дали свій вклад до юбілею і до выготовліня памятной таблы. Так само были в приговорі підкреслены важны факты, про котры бы не мали Русины забывати на Добряньского.

Потім уже слідовало святочне одкрытя таблы. Таблу одкрывали Теодозія і Іґор Латтовы, головны ініціаторы той думкы і Петро Медвідь за презідію Округолого стола Русинів Словеньска, головного орґанізатора події. По одкрытю была заспівана гімна „Подкарпатские Русины“, котра ся на Русинами населеных теріторіях офіціално хосновала за часів 1-ой Чехословацькой републікы і доднесь єй хоснують Русины Пряшівщіны і Підкарпатьской Руси.

Памятна табла одкрыта 18-го децембра 2017-го року є першым памятным артефактом присвяченым Адолфови Добряньскому на теріторії міста Пряшів. Находить ся на стіні в половині ґарадічів, і так є єй видіти і при вступі до Руського дому і при одходжіню.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА