Додрук книжкы «Piorunka – Перунка i jej mieszkańcy»

Кіньцом т.р. додруком вказала ся моноґрафія русиньского села Перунка, яку перед десятьома роками довєдна написали Димитрий Русинко та Адам Барна. Книжку «Piorunka – Перунка i jej mieszkańcy» мож уж придбати.

До написаня публикациі Димитирий Русинко і Адам Барна забрали ся головно з потребы утырваліня істориі і памяти про Перунку, яка з 1947 роком перестала істнувати як лемківскє село. Книжка вказала ся в польскым языку, понеже, як арґументували авторы, на жаль молоде поколіня не знат кірилиці, а при тым ани не хоче ся єй вчыти, а они самы хотіли предовшыткым переказати полний єй зміст.

Димитрий Русинко, роджений в 1941 році в Перунці, вчас выгнаня мал лем 6 років, але не пошкодило му оне в написаню мононоґрафіі такой в піл рока. Через першы два рокы разом з А. Барном зберали материялы, стары фотоґрафіі і інтервю од найстаршых жытелів села, якы по выганю оселены остали головно в околицях Пшемкова, Рудной і Студзьонок, в днешнім нижньошлескым воєвідстві. Книжку допомагал написати Адам Барна, якій в своій плідній авторскій працы, написал пару лемкознавчых публикаций. Його скушености допомогли найліпше приготовити выданя.

В 2007 році книжка вказала ся в невеликым тиражы (лем 250 штук). Того рока, Д. Русинко рішыл про печатаня ІІ выданя публикациі, яку одтепер мож придбати м.ін. в Інтернеті (ціна 35 зл). Як остали сме поінформуваны – кєд явит ся желаня закупліня книжкы «Piorunka – Перунка i jej mieszkańcy», може она быти довезена до охочых в Ліґници.