Высока позиция лемківскых дослідників і лемкознавчых досліджынь

В останім часі потверджена остала выняткова позиция, яку мают на Ягайлоньскым Університеті філолоґы-Лемкы. Отже, Філолоґічний Выділ Ягайлоньского Університету за остатній рік мусіл доложыти вельох старань, жебы з катеґориі Б, в якій ся нашол подля загальносвітовых критерий параметризациі веденых науковых діянь, перейти до катеґориі А, што дає гідні высшу наукову позицию і можности розвитку. Стараня, докладаны вшыткыма науковыма  працівниками, принесли жданий успіх. 

На Раді Філолоґічного Выділу ЯУ дня 1. грудня/децембра было оно одсвяткуване. При тій нагоді декан выділу, проф. др габ. Ельжбєта Ґурска, публичні оголосила, што на тото влинуло. Вказало ся, же основне значыня – і то в величезній скали, в однесіню до інчых пунктуваных осягнінь – мало 10 найбарже ефективных і найвысше оціненых дослідничых успіхів выділу. Пані Декан прочытала тых десят основных для цілой параметризацийной пунктациі осягнінь і вказало ся, же седед них на першым місци, тзн. серед 4, котры мали максимальне чысло пунктів 10/10, нашли ся досліджыня, ведены др габ. Оленом Дуць-Файфер, посвячены ревіталізациі і розвиткови лемківского языка і культуры на вельох площынах. Розвиваны сут они в рамках вельох медженародных і крайовых проєктів, посвяченых загороженым языкам і травмі спільнот, якы тратят основы свойого добростану і достоменности.   Але мало того, в тій десятці найважнійшых науковых осягнінь нашли ся тіж досліджыня др Томы Квокы, якы веде він в рамах проєкту Community-Based Policing and Post-Conflict Police Reform. То проєкт ведений в рамках спілпрацы 11 європейскых інституций і 5 реґіональных партнерів. Фінансуваний єст з середків проґраму Європейской Уніі Horizon 2020 ‘Secure Societies’.  

Вартат підчеркнути, же в склад Філолоґічного Выділу ЯУ входит 9 інститутів, в тым Інституты Філолоґій: английской, ґерманьской, клясичной, романьской, славяньской, східньославяньской, Інститут Орєнталистикы, Інститут Языкознавства, Інститут Досліджынь над Перекладом і Медженародном Комунікацийом. На выділі веденых єст 19 напрямів студий. Працує гев понад 400 науковых і дидактичных працівників, студиює праві 5 тис. студентів. 

Тых двоє Лемків, якы приносят учельни і выділови своіма досліджынями найвысше оцінены ефекты, то факт, якій вартат достеречы. Вартат тіж звернути увагу, же – подля світовых критерий оціны важности веденых досліджынь – вшыткы діяня, якы мают прикметы тнз. заанґажуваной гуманістикы і мают высоку соспільну придатніст, то сут діяня з найвысшом вартістю. Таку вартіст достерігат ся в занґажуваным ратуваню, ревіталізуваню лемківского языка і культуры. 

текст надіслала др габ. Олена Дуць-Файфер