Карпатскы книжкы нагороджены

В рамках 26. Загальнопольского Перегляду Краєзнавчой і Туристичной Книжкы нагороджено вельо публикаций тыкаючых карпатской темы. Серед них нашла ся книжка авторства Ярослава Ґємзы пн. «Церкви і іконы Лемковины», яка отримала II премію.

26. Загальнопольскій Перегляд Краєзнавчой і Туристичной Книжкы орґанізуваний єст Польскым  Туристично-Краєзнавчым Товариством, Медженародныма Познаньскыма Торгами та Самоурядом Великопольского Воєвідства. Лавреатам першых місц в 2017 р. в окрисленых катеґориях конкурсу орґанізаторы запевняют безплатны місця на стоіску Перегряду в обшыри Выграных 2018 вчас Tour Salon 2018.

Найвеце премій отримала книжка Адама Чарновского пн. «О татряньскых почтовых картках», яка є лавреатком м.ін. 2. Медженародного Конкурсу «Найліпшы выдавництва о горах» 2017 р. На 26. Загальнопольскым Перегляді Краєзнавчой і Туристичной Книжкы отримала она I нагороду в катеґориі краєзнавчых альбомів. I нагорода в катеґориі моноґрафіі і другы краєзнавчы опрацуваня передана была двотомовій публикациі «Західня Бойківщына – вчера, днес і заран» ред. Яцка Вольского. Другє місце в тій же катеґориі отримала як раз книжка Я. Ґємзы, яку выдало Выдавництво Лібра в 2016 р.

«Церкви і іконы Лемковины» то монументальний труд, в котрым повністю представлена є церковна артистична культура з обшыри Лемковины вписана в контекст руско-візантийского мистецтва. Я. Ґємза є выдатным знавцьом церковного мистецтва, кєрівником Одділіня Церковной Штукы при Музею Замку в Ланцуті, автором дописів про церковну штуку та редактором вельох науковых робіт. Більше про книжку та автора найдете за тым мотузком.

III місце припало «Природничому путівникови по польскых Татрах» Томаша Скшыдловского та публикациі пн. «Шляком культуровых і природничых особливости польско-словацкого погранича: туристичний путівник» ред. Барбары Ґонсьоровской.

То лем част нагородженых книжок. Вшыткы выріжнены творы будут вказаны на торговым крамі вчас Tour Salon в днях од 9. до 11. лютого/фебруара 2018 р. в Познані. Што веце, публикациі будут промуваны на інтернетовым сайті та на фейсбуковым фанпейджы Перегляду Книжкы.