ЕЛПІС завершыл дальшы етапы ревіталізациі стародруків

Кінцьом т.р. Єпархіяльний Осередок Православной Культуры ЕЛПІС в Ґорлицях завершыл дальший етап ревіталізациі стародруків – інформує о тым інтернетовий сайт осередка. Проведены роботы то пятий етап прац, якій был дофінансуваний з публичных грошів. 

В рамках остатньой ревіталізациі повело ся одновити три церковни книгы, якы находят ся в єпархіяльным музею в Ґорлицях. Сут то Октоіх і Тріод Постна з 1699 рока, в якых найдеме інтересуючы одручны запискы, та пізнійший Типікон з 1780 рока. Книгы были надрукуваны в львівскій та почаівскій печатнях.

Проґрам Охорона забытків, задача пн. Ґорлиці, колекция стародруків (ХVII – XVIII ст.): консервация колекциі кіриличных книг, был дофінансуваний з середків Міністерства Культуры і Народовой Дідовизны. Окрем того, фонды на проєкт передали Малопольскій Маршалківскій Уряд та Староство Повітове в Ґорлицях. 

ЕЛПІС протягом т.р. вюл другій проєкт пн. Книгы мают свою історию. Продолжыня консервациі колекциі кіриличных стародруків в рамках проґраму Спераня музейных діянь. Тот проєкт довюл до консервациі штырьох стародруків з XVII-XVIII ст., т.є. Требника, Акастыстів, Літургікону, та Ключа Разуміня. Речений проєкт так само был дофінансуваний з середків Міністерства Культуры і Народовой Дідовизны. 

Осередок ЕЛПІС од 6 років веде діяня, якы мают на ціли сохраніня і консервацию стародруків, якы находят ся в посіданю Єпархіяльного Музею Стародруків і Церковной Штукы в Ґорлицях. Єдным з цілів осередка є привертаня памяти про друкарні, люди та місця повязаны з друками. Днес в колекциі находят ся 64 стародрукы, з котрых на 28 проведено полну консервацию. Серед колекциі находят ся книгы, якы походят з храмів на Лемковині.

фот. www.orthodox.pl