Русины мають філмовый клуб

В Центрі молодых Русинів в Братіславі од днесь зачінають вівторковы філмовы вечоры під назвов Філмовый клуб Rutheni. Орґанізаторы ся в рамках філмовых вівторків хотять заміряти на документы з русиньсков тематіков.

Першый філмовый вечур одбуде ся днесь, 7. 10. 2014 р., зо зачатком о 20.00 год. Новостьов Центру молодых Русинів суть і годиновы курзы русиньского языка про зачаточників, котры мож навщівляти каждый вівторок о 17.00 год. Центер тоты курзы орґанізує в співпраці з обчаньскым здружіньом Колысочка, котре здобыло на тоты курзы дотацію в рамках проґраму Култура народностных меншын.

Подля слов Петра Штефаняка, председы орґанізації молоды.Русины, котра є зряджовательом Центру молодых Русинів в Братіславі, продовжують і курзы русиньского языка про покрочілых. Тоты ся з понеділька пересунули на середу о 11.00 год. дополідне. Перша лекція по вакаціях буде в середу 8. октобра.

Центер молодых Русинів в Братіславі одкрыли в септембрі 2013 р. Свою канцеларню ту має молодежна орґанізація молоды.Русины, але є то і центер інтернетового радіа русин фм і фолклорного колектіву Рутенія, інформовала TASR (Пресова аґентура Словацькой републікы).