Краса лемківской кухні і Розтокы з Окрасом в TVP1. Премєра уж заран

Уж заран, 2. грудня/децембра, в TVP1 выемітуваний буде премєровий одтинок популярного кулінарного проґраму пн. Окраса ломит переписы. Гістми суботнього переданя будут Руснакы, члены фольклорного ансамблю Розтока з Рудной, якій в любіньскым повіті гідні репрезентує лемківску культуру. Початок емісиі о год. 13.35.

Знимкы до одтинка не были кручены на Лемковині, але не вадило то ведучому Окрасі зміряти ся з лемківском кухньом. Проґрам записано на чужыні, в Хобєні (ґм. Рудна). Награня прошли початком вересня/септембра 2017 р. Кароль Окраса, польскій кухар, до найновшого одтинка проґраму запросил членів ансамблю Розтока. Колектив, якій в більшости складат ся з жен, представит заран модераторови дві лемківскы стравы.

Кароль Окраса, заінспіруваний лемківском кухньом, вєдно з членкыньом ансамблю, Анном Олеснєвич, прирыхтує на основі кєселиці грибову поливку, а дорша запече з мастилом.

А што більше? Дознаме ся уж заран.

 фот. фанпрейдж ансамблю на Фейсбуку