«Слово» – 25-тя неділя по Сошетствії Святого Духа – неділя, 9.00 год.

Євангеліє днешньой неділі нам росповідать о учітельови закона, котрый пришов за Ісусом з вопросом: Што робити, жебы набыти вічный жывот? Но справды не глядав одповідь, но пришов пробовати Ісуса, дословно покушовати го.

Ісус видів до його внутра, не одповідать йому, але сам ся звідує, што є написане в законі. Кідь законоучітель одповідать о любви ку Богу і ближньому, Ісус на то реаґує: Так роб, і будеш жыти. Но він ся хоче оправдати і просить ся Го: А хто є мій ближній? На Ісус што росповідать історію о чоловікови, котрый сходить із Єрусалима до Єріхона. Там на нього напали розбійникы, котры го розблекли, окрали і охабили ледво жывого. Тов дорогов ідуть різны люди. Священик, левіт, і Самаріян. Но лем тот поміг тому нещасному. Змилосердив ся над ним, вылляв вино і олій, высадив на осла привів до гостинця, як одходив дав господарьови пінязі, і кідь вытратить веце, при приході му заплатить.

Ісус ту говирить о собі. О Його великій любви ку чоловікови, ку каждому із нас. Бо мы сьме тым ледво жывым на дорозі. Кідь рішіньом свойой волі одходиме од Бога і сходиме долов, і нападаны діяволом і його демонами через гріх, страсти і різни порочности сьме ранены і ледво жывы духовно. Закон і пророкы конштатують реаліту стану но лік не дадуть. Но Ісус, котрый пришов не зо Самарії, але з Марії, бере нас на свої рамена (осла – людьске тіло, котре прияв про наше спасіня) веде до свойой Церькви, де подає нам уздравліня з тых ран. Тото євангеліє нам так само указує, же як несправедливо много раз реаґуєме, кідь притрафить ся нам дашто плане в жывоті а такой то богозневажливо односиме ку Богу. А Бог хоче лем єдно, хоче лем наше добро, наше спасіня, не зло. А тыж жебы сьме подля прикладу Господа были тыма Саміріянами про нашых ближніх, што суть коло нас. Ці помочов матеріалнов, ці словом потіхы, ці іншым способом проявляли милосердя. Бо Ісус тото приписує, як зроблено Йому самому. А законоучітельови і нам наконець додає: Ідь і роб таксамо. Слава Ісусу Хрісту!

В неділю, 26. новембра 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 26. новембра о 15.00, 20.00 год. і 27. новембра  o 2.00 год. за русиньскым часом.

Фото: Армюньскы діти, біженці із Турції, евакуованы французьков армійов в Порт Сайді в Егіпеті. Жрідло: Wikipedia.