100-літя карпаторусиньской парафіі в ЗША

В найблизший вікенд 10.-12. жолтня, в американьскым місточку Корнінґ (Corning, NY) буде проходил праздник 100-літя основаня парафіі Покровы Пресвятой Богородиці, котрой парохом єст о. Даниіл Малер. Празднуваня зачнут ся 10. жолтня, а скінчат 12. жолтня Божеском Літургійом, котрій буде проводил владыка Григорий, титулярний єпископ Ниссы, предстоятель Американьской Карпато-Русиньской Єпархіі ЗША

Корнінґску парафію в 1914 р. заложыли еміґранты з Пряшівской Руси (головні зо Стащына в сниньскым окресі), якы, ідучы за хлібом і ліпшым жытьом, зачали ся оселяти в тій околици од кінця ХІХ столітя. Початком, была то грекокатолицка парафія, але в 30. роках ХХ ст., з причыны латинізацийной політыкы Церкви (м.ін. ватиканьскій заказ высвячаня женатых кандидатів на священників), якій противны были Карпаторусины, вірны 37 парафій (в тым парафіі з Корнінґ), скликуючы локальний собір в пенсильваньскым Пітсбурґу, рішыли перейти під юрисдикцию православного Вселеньского Патріархату, з котрого – што підкрислили зобраны на соборі – християнство принесли в Карпаты Солуньскы Братя, свв. Кірил і Методий. Тым способом основана была нова адміністрацийна єдиниця в рамках патріархату – Американьска Карпато-Русиньска Єпархія ЗША. Єй першым єрархом был роджений іщы в Старым Краю, в селі Ортутова к. Бардийова – єпископ Орест Чорняк (1883-1977).