Свіржава (пісня барда з драмы Сон Білого Хорвата)

Ой, Свіржаво, ой Свіржаво,
Карпатова водо –
Рад о тобі пісні сьпівам,
Бесідую з тобом,
Рад о тобі сьпівам пісні,
час споминам давний –
Най не тихнут, як твій черкіт,
дни далекы – славны.

Ой, Свіржаво, ой Свіржаво,
Звати тя Лаборцьом,
Ой, бо в тобі червеніла
Мого князя кровця,
Багряніла в тобі кровця
Лаборцьовых воів,
Біль пекучий, біль остатній
Черкіт твій ім гоіл.

Ой, Свіржаво, ой Свіржаво,
Лаборцьова водо,
Вертат ся мі час далекій
При бесіді з тобом,
Час далекій ся мі вертат,
Хоц ты, водо, течеш,
Все лем долов, все до устя –
Як жытя чловече.

З Лемковины, з Фльорынкы, з пропамятного і дорогого вшыткым Лемкам місця основаня Лемківской Республикы принесли сме землю, жебы покласти єй в місце де стоіт різба Князя Лабірця.

А попри тому Петро Мурянка заспівал пісню Свіржава з драмы Сон Білого Хорвата.