Осіння «Бесіда» – уж доступна

Стоваришыня Лемків печатало найновше чысло свого пресового орґану – двомісячник «Бесіда», но. 5 (158), вересен-жолтен 2017 р.  Нове выданя свойом передньом окладинком кликало на ювілейну ХХV Лемківску Творчу Осін, яка проходила в половині жолтня/октобра т.р. на Лемковині. В ґазеті мож прочытати м.ін.:

• Петро Медвідь, Герой (Присвячене 70-ым народенинам Петра Трохановского);
• Ваньо Дзядик, Нашым предкам выгнаным зо своіх сел в Бескідах;
• Петро Трохановскій, При Джерелах;
• Андрий Копча, 70-літя і 80-літя… то є – о XXXVII Лемківскій Ватрі на Чужыні;
• Демко Трохановскій, Йосиф Ярина – незнане о мало знаным філософі двіста років од його смерти;
• Петро Медвідь, 140 років од народжыня Константина Грабаря;
• Ваньо Дзядик, Християньска Кападокія – серия National Geographic або Подорожы Лемків;

Окрем выміненых горі статі, посліднє чысло «Бесіды» приносит нам як все скоропис найважнійшых новин з Лемковины і не лем. Поличка з доступной пресы вєдно з коментарями дає можніст запознати ся з фраґментами статій так з польской ай словацкой пресы, якы односят ся до русиньскых тем. Внутрі найдеме тіж польскоязычне інтервю проведене з Петром Мурянком, якє одбыл Александер Навроцкій. На єдній з остатніх стран годны сте видіти надісланы желаня і кореспонденцию в вязку з ювілейом шефредактора часопису Петра Трохановского. 

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвячений єст збережыню істориі, культуры і языка Лемків, інформуючий о жытю нашой і братніх нам соспільности, плекаючий вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 08.00-16.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.