На Червеній ружі передали i літературну премію

В суботу, 21-го новембра 2017-го рока, в Ужгороді проходив 18-ый річник Фестівалу русиньской културы Червена ружа. В рамках фестівалу была передана і Літературна премія Александра Павловіча за 2017-ый рік.

Фестівал тот рік проходив в просторах Закарпатьского академічного областного театру лальок „Бавка“ в Ужгороді. Попередні рокы фестівал орґанізовав ся в Мукачові. Святочно го одкрыв Євгей Жупан, голова Народной рады Русинів Закарпатя, яка зъєдинує русиньскы орґанізації діючі на Підкарпатю, і котра є орґанізатором події. Жупан у приговорі підкреслив, же Русины суть мірный і законопошлушный народ, котрый лем хоче мати права, жебы розвивати свою културу і свій язык. Так само выразив радость, же напрік многому, што ся робило проти того, жебы фестівал орґанізовав ся, і все ся глядали причіны, чого го не робити, в суботу ся люди могли стрітити вже на його 18-ім річнику.

По святочнім одкрытю 18-го річника фестівалу Червена ружа вже сцена належала умелцям. Модераторьскым словом фестівал проводили Ольга Прокоп і Ліліа Немеш, котры співають в дуо Червена ружа і проґрам обогатили і своїма співанками.

В рамках фестівалого проґраму выступило дакілько ансамблів і солісітів, міджі котрыма мож спомянути такы мена як дітячій ансамбель Бабчіна співаночка, Сестры Перечинщіны, женьскый ансамбель Чинадієвка, Клара Лабик, Мірослава Копинець, Олена Полак ці Петро Матій. На фестівалі зазвучала і сучасна русиньска поезія, котру прочітали їй авторы, міджі іншыма Йосиф Лемко, лавреат Літературной премії Александра Павловіча за 2014-ый рік ці Іван Ситар, автор тлумачінь поезії Єсеніна на русиньскый язык, але і далшых книжок авторьской поезії і тлумачінь.

І тот рік почас фестівалу передавала ся Літературна премія Александра Павловіча, котру выголошує Народна рада Русинів Закарпатя. За 2017-ый рік премію здобыв Юрій Чорі. Автор 64-ох книжок, окрім іншого і пятьтомного выданя „Словарь русинського языка“, здобыв премію за його так само пятьтомный словник русиньскых фразеолоґізмів.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА