ХI Cтрічы Трьох Поколінь на фоні 70. річниці выгнаня

Кружок Стоваришыня Лемків в Пшемкові то єдно з найактивнійшых одділінь цілой орґанізациі. Серед своіх штоденных задач має м.ін. ведіня ЛАПіТ Ластівочка. Од єденадцетьох років являт ся і орґанізатором культурной подіі Стрічы Трьох Поколінь з Лемківском Культуром. Тогорічна, XI едиция акциі пройде 4. листопада/новембра т.р. Початок о 16.00 год.

Подія буде проходила в Пшемківскым Осередку Культуры. Бодай лем раз Стрічы проходили поза границями міста – причыном была модернізация осередка. В тогорічным проґрамі буде нагода ся стрітити так з солистами, як і ансамблями. На сцені запрезентуют ся не лем місцевы артисты, але і тоты з Лемковины.

Єдным з солистів буде Петро Мурянка, якій не так давно празднувал ювілей 70-літя народжыня та 45-літя роботы на ниві русиньской культуры. Як співак запрезентує своі авторскы творы. Другым гостьом з рідной землі буде співачка з Лоси, Юлия Дошна, яка переспівує вельо народных і авторскых пісен. Подібні як Петро Трохановскій, за молодых років выступувала з ансамбльом Лемковина з Білянкы, а не так давно нагрывала до другой части платні «Пісні і співанкы Петра Мурянкы».

Стрічы Трьох Поколінь зас будут гостити Рамону та Наталию Бочнєвич, якы од парьох років творят ансамбль Сестры Бочнєвич. Тоты професийны музыканткы та композиторкы, якы мают музычну освіту, днес занимают ся єднаньом традицийной лемківской музыкы з авторском обробком та оркєстровым выконаньом творів.

Вкінци на пшемківскій стрічы выступлят ґаздове, а при тым ансамбль діючий під орґанізатором подіі. ЛАПіТ Ластівочка од часу, коли отримал престіжний, медженародний цертифікат ЦІОФФ, фурт досігат дальшых успіхів. Остатньо інформували сме про тото, што Ластівочка перемогла в Загальнопольскым Конкурсі Традицийного Народного Танця. В плянах мают дальшы проєкты, м.ін. хочут выдати нову платню з русиньскыма співанками.

При старшій Ластівочці фунґує і дітяча ґрупа Ластівчата, яку можеме стрічати на ріжного рода лемківскых подіях в реґіоні. Ансамбль презентує формы дітячых забав, якы близкы были нашым предкам на Лемковині, та рыхтує співанкы і танці. Послідньом выступуючом ґрупом буде забавова капеля Троянда, яка од років грыват предовшыткым забавы і весіля на чужыні.

Одкрытя таблиці 

Перед тым, як зачнут ся IX Стрічы Трьох Поколінь, в православній церкви св. Михала Архангела о 15.00 год. буде одслужена панихіда в памят жертв выгнаня 1947 рока, пак буде одкрыта та посвячена пропамятна таблиця присвячена 70. річници выгнаня Лемків.