Другій тыжден жолтня – «Говорить Пряшів» – пятниця, 20.00 год.

Давно сме ся гев не виділи. Не зато же не было премєр поучытельного проґраму «Говорить Пряшів», але зато же сме Вам, дорогы слухачы, заявок не писали. 

Причынків ґу тому мож глядати пару, але о тым неє што споминати. Ліпше іти вперед і постепенно робити лем добру роботу. Добру роботу днес зроблят (роблят) в Креници, де наш, вшыткых Русинів (не лем з Лемковины), Мурянка має свій «сивий» ювілей сімдесяткы. І мы гын будеме. Кус чудно Вас просити на днешню премєру, кєд, подля нашого розуму, Вашым і нашым обовязком винна быти присутніст з Мурянком в тот ден, як подяка за його жытьовий старунок о лемківскій нарід, але неє рады на ґрафікы. Што сме обіцяли – слова мусиме дотримати. Жебы нам інчы не зашмарили. 

Кєд не будете в Креници, кєд Вам дорба вечерня пятничка дозволит сісти при радию (компутері, мобільці, таблеті), та влучте Ваше перше лемківскє радийо і слухайте того, што знати треба. Выходиме з того, што наукы і добрых вісти николи не за вельо. Так є і в передачы «Говорить Пряшів», яку рыхтує братиславскє радийо Русин.фм, нашы камаратя, нашы молодшы братя. Але хвиля. Радийо то «она», значыт молодша сестра. Чом си дозваляме быти старшыном? Но-ле… То лем сама істория, найновшого, модерного одроджыня Русинів. 

Но, а тепер коротко і на тему. В днешній премєрі запрашаме слухати м.ін. про вызнаний рід Бачыньскых в Нашых Целебритах, а в Книжници про творы Емилия Кубека. 

До іщы ліпшого почутя!

За радийом Русин.фм чытаме: Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.