Музей в Креници просит на стрічу з Крогом

Антоний Крог, етноґраф і дослідник карпатского реґіону, в пятницю, 20. жолтня/октобра т.р., о 17.00 год. буде мал авторску стрічу в Музею Никыфора в Креници – поінформувал Округовий Музей в Новым Санчы.

На стрічы, модеруваній Збіґнєвом Воляніном – працівником новосандецкого музею, запрезентувана буде послідня книжка Антония Крога – За тамтом гором, што ся вказала кінцьом 2016 рока.  Буде то бесіда двох дослідників, якы вымінят ся своіма поглядами і досвідчынями. Подібну форму мала єдна з першых промоций книжкы, яка проходила в Ден Нацийонального Свята Русинів в Польщы, 5. грудня/децембра 2016 р., в просторах Руской Бурсы в Ґорлицях. А бесідували товды зо собом автор публикациі та Петро Мурянка. 

Новосандецка стріча буде получена з вернісажом выставы Кроговых фотоґрафій, якы были ним зниманы вчас його етноґрафічных досліджынь на Лемковині протягом остатніх 40 років. Выстава пожычена з Музею Опольского Шлеска в Ополю. 

Крог цінит Лемків 

В книжці За тамтом гором Крог представлят своі першы стрічы з Лемками, як сам пише –  народом, якій в наслідстві выгнаня стратил вшытко. Але чытаючы його передуманя, мож ся надіяти, што іщы не вшытко щезло. Крог цінит сой Лемків, іх впертіст і еґзистенцию по 1947 році. Сам пише, што Лемкам іщы далеко до одслужыня остатньой панихіды. Споминат він о першых концертах великой Лемковины, о лемківскых зъіздах на рідній земли – Ватрах, якы на початку были лемківскыма не лем з назвы. Книжка збогачена є знимками автора з часів його вандрівок по Лемковині.