FUEN хоче розмаїтость языків

Федерална унія европскых меншын (Federal Union of European Nationalities, FUEN) орґанізує петіцію, котров хоче зліпшыти охорону членів народностных і языковых меншын. Вызберати хоче міліон підписів.

Minority Safepack

„Апелуєме на Европску унію, жебы зліпшыти охорону членів народностных і языковых меншын і укріпляти културну і языкову розмаїтость в Унії,“ пише ся на сайті петіції.

FUEN iніціатівов, котра дістала назву Minority Safepack, апелує на Европску унію, жебы быв приятый леґіслатівный пакунок, котрый бы мав обсяговати політічны крокы в области реґіоналных і меншыновых языків, освіты і културы, як і реґіоналной політікы, участи, рівности, авдіовізуалных і іншых медіалных обсягів, і так само реґіоналной (державной) помочі.

Жебы мож підписати тоту ініціатіву, є потрібне быти гражданом Европской унії (гражданом єдной із членьскых держав) і мати вік, котрый позволять голосовати у выборах до Европского парламенту, што є 18 років, з вынятком Австрії, де є граніця віку знижена на 16 років.

У FUEN суть і Русины

Федерална унія европскых меншын є міджінародна мімовладна орґанізація, котра была заснована в 1949 році в повязаню із вытворіньом Рады Европы. Днесь суть в орґанізації десяткы членьскых орґанізацій, котры заступають етнічны, языковы і народностны меншыны. Федерална унія має ку днешньому дню лем єдного члена в рамках русиньскых орґанізацій в Европі. Тым є Общество карпатьскых Русинів із Україны, котрого головов є Євген Жупан.

FUEN допомогла ку тому, жебы Рада Европы прияла Европску харту реґіоналных або меншыновых языків і Рамковый договор на охорону народностных меншын. Унія была заснована і зато, жебы ся могли на даякій платформі выразити і европскы културы і языкы, котры не мають свою властну державу. Єден із семох Европанів притім належыть як раз ку такій меншыні і в Европі ся бісідує 53-ма такыма меншыновыма языками.

Протест і проти закона Україны

В остатніх днях Федерална унія европскых меншын загнала одкрыте писмо україньскому презідентови Петрови Порошенкови, в котрім выразила свій глубокый неспокій повязаный із приятьом додатків ку Закону о освіті Верьховнов радов Україны.

За думаками FUEN тоты позмінюючі і доповнюючі пропозіції мають за наслідок позбавліня народностных меншын на Україні можливостей здобыти одповідну освіту в їх материньскім языку, окрім матерьскых і основных школ. Унія пише, же тот закон є в незгоді із Конштітуційов Україны, котрой обсягом є і то, же є ґарантованый свободный розвиток, хоснованя і охорона языків народностных меншын Україны. Закон так само порушує міджінародны обовязкы Україны підпорьовати права народностных меншын і підпорьовати реґіоналны і меншыновы языкы на своїй теріторії.

Закон о освіті остро крітікують і офіціалны мадярьксы власти, Румунія, проти закона поставили ся і словацькы депутаты в Европскім парламенті, як і представителі далшых держав.

Ініціатіву Minority Safepack можете підписати на офіціалнім сайті, котрый має різны языковы мутації, подля того, із котрой державы ся на сайт приголосите.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА