Памятный металь міністра обороны про Русина

Міністер обороны Словацькой републікы Мартін Ґлвач нагородив з нагоды 10. выроча вступу Словацькой републікы до NATO памятным метальом робітника Міністерства обороны СР Мілана Пилипа.

Русиньскый актівіста Мілан Пилип – походжіньом із Бардейова, котрый стояв коло взнику Округлого стола Русинів Словеньска (є його секретарьом), є державным робітником Міністерства обороны майже десять років. Робить там в области господаріня з маєтком і розвитку інформачных сістемів.

Памятный металь міністра обороны є воєньскым метальом, котрый ся вручать професіоналным воякам, воякам чуджіх армад, жытелям Словацькой републікы або жытелям іншых держав, як оцініня за державну службу, заслужный акт або співроботу з озброєныма силами Словацькой републікы. Памятный металь уділив міністер обороны писемным воєньскым розказом з нагоды 10. выроча вступу Словацькой републікы до NATO.

Мілан Пилип, котрый є міджі нагородженыма, собі памятный металь перевзяв із рук ґенералного директора секції маєтку і інфраштруктуры Міністерства обороны Словацькой републікы Йозефа Дрозда.

Текст: Луція Рогальова

Протлумачів: Петро Медвідь

Фото: Михал Кожух

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА