«Пастырство в Карпатах»

Карпатскє Товариство просит на популярнонаукову конференцию «Пастырство в Карпатах. Ґенеза та сучасний образ», котра пройде 25. листопада/новембра т.р. в Люблині, в сали Академіцкого Центра Культуры УМКС «Хатка Жака» при ул. Радзішевского 16.

Офіцийний початок конференциі заплануваний єст на 10.00 год. Проґрам подіі обнимат серию выкладів, вернісаж фотоґрафічной выставы, промоцию нового чысла часопису «Фолькова Ґазета» та концерт ансамблю Оркєстра Св. Миколая. В першій части проґраму будеме мати нагоду выслухати доповіди про волошскє осадництво в Карпатах в XIV-XVII ст., виды пастырскых колиб на обшыри Карпат, корінных жытелів гір в середвічных хроніках та про жены на полонині. Друга сесия зачне ся выкладом про музычну культуру карпатскых пастырів, вчас котрого запрезентувана буде гра на пастырскых інструментах. Дальше буде іщы м.ін. про гуцульску сучасну пастырску архітектуру та давне і сучасне пастырство Чорногоры.

Конференциі товаришыти буде вернісаж фотоґрафічной выставы «Сучасний образ карпатского пастырства», торжественне отвертя котрого пройде о год. 17.30. Пак промуваний буде спомнений уж новий номер часопису «Фолькова Ґазета», а дальше заграт Оркєстра Св. Миколая.

Вчас конференциі буде мож купити м.ін. выбраны публикациі выдавництва Лібра та платні Оркєстры Св. Миколая.

Фот. Джерело: karpaccy.pl