«Традицийна Музыка – фоноґрафічний дебют» – новий проєкт ІМІТ в Польщы

Інститут Музыкы і Танця в Польщы отворил новий дотацийний проґрам «Традицийна Музыка – фоноґрафічний дебют», в рамках котрого выконавці традицийной музыкы або той інспіруваной традицийном музыком нагрывают платню.

В проґрамі можут брати участ не лем солисты ци ансамблі, але тіж выдавці і продуценты фоноґрафічных награнь в Польщы. Можут то быти так представникы найстаршого поколіня артистів, як і молоды выконавці, якы не дебютували іщы на фоноґрафічным рынку. Запис винен презентувати польску музыку або музыку меншыновых ґруп, котры мешкают на обшыри Польщы або історичні ю заселяли.

Важне є, жебы награний музычний материял оддзеркалял компетенциі артистів в обшыри знаня джерел той музыкы і єй выконаня. Окрем того авдийозапис мусит быти першым професийным музычным альбомом в жытю выконавці ци лідера ансамблю.

Інститут фінансує вынагороджыня для выконавців, нанятя награньового студия, мастерінґ авдийозаписів, проєкт окладинкы, оплаты ZAiKS та тлочыня платні – вшытко в квоті до 20 тис. зл.

Зголошыня мож слати до 2. жолтня/октобра т.р. Дрібниці найдете на сайті imit.org.pl

Фот. Джерело: imit.org.pl