«Слово» – 15-та неділя по Сошетствії Святого Духа. Початок нового церьковного рока – неділя, 9.00 год.

Місяць Септембер є в нашій Церькви візантійской традіції початком нового церьковного і літурґічного рока. Євангеліє нам описує приход Ісуса Хріста до Назарета.

В день суботный в сінаґозі встав, жебы чітав з книгы пророка Ісаії. Дух Господа є на мі. Він ня помазав проповідати вязням свободу, сліпым повиджіня.. і голосити рік Господнього приятя. Є то час, коли Бог нас принимать, кідь приходиме ку Ньому з нашыма гріхами, слабостями. Тот спасительный час є од приходу Ісуса на землю а буде тырвати аж до Його другого приходу. Або в одношіню ку нам од народжіня аж по нашу смерть. Св. Василій говорить, же днесь є Бог милостивый ку каждому грішникови, приготовленый одпустити каждый гріх, но завтра буде немилосердным судцьом нашых слов, діл і думок. Покля жыєме, Бог простерать якбы свої рукы ку нам, запрошать нас до свойого Царьства, не гнівать ся на нас, коли приходиме з покаяньом. Св. Церьков нам тото припоминать каждого року празднованьом Нового церьковного рока, позывать ку новому жывоту, новому початку, зохабити старый жывот гріха, злобы, ненависти, нелюбви, і зачати новый подля Божых заповідей. Каждый день вказує нам приклады тых, што ішли перед нами, котры были такы самы люде як і мы, жебы ся нихто не міг выгваряти. Господь дає нам свої благодати. В євангелію Ісус говорить, же пришов проповідати вязням свободу. Значіть, же Бог зробив вшытко, зничів смерть, владу діавола, отворив двері, но выжадує одповідь, выйти з темноты до світла. Тото за нас не зробить, бо решпектує нашу свободну волю. А так приймийме тото запрошіня, бо може уж тот рік є нашым посліднім. Не прогайнуйме тот спасительный час, котрый нам Бог у своїй доброті давать. Слава Ісусу Хрісту!

В неділю, 17. вересня/септембра 2017 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 17. вересня/септембра 2017 р. о 15.00, 20.00 год. і 18. вересня/септембра o 2.00 год. за русиньскым часом.

Фото: Іконостас в катедралнім храмі в Гайдудорозі. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА